FREMDER SENDER

6.5. - 5.6.05

STADTGALERIE / STAGE BERN

(unten. EINLADUNGSKARTE)

Dominik Ivo Meyer, Oscar Wiggli, Hans Bardill

Begrüssung: Beate Engel, Kuratorin Stadgalerie

Tilo Steireif, DJ pcb, Lydia Möst und Cédric Henny; im Hintergrund Hans Bardill, Ascharina

Einführung: Marietta Kobal aus Fideris

Asä, jetz bin i da in dr Frömdi bi Frömdnä und sötti eu äswas ärzellä us dr Frömdi, us äm Prättigau. Vu däm wa zletscht Jahr bin ünsch passiärt ischt. Alläs chani zwar nid ärzellä, sus werämär morä no da. Drum khörädr jetz eifach äswas vu däm wo i sälbär ärläbt han und wo mr zimmli Iidruk gmachät hed.

Agfangä heds im Novembär vum vorletschtä Jahr. Duä hendsch än Buubäraggä gfergät und schä zwüschät d Schtrass und di Bahngläis gschtellt. Dass si di Bhusig vum Frömda Sendär, heds gheissä. Duä hanni gsinnät, dass brucht au no komischi Vögäl, wo da gä husä chomänd.

Ja nu, witrs hani denn äs Wiili nüd mee ghört.

Ämal äs Tagsch hed schi eini gmoldä; schi wetti värbii cho. Äs hed wakkär Schnee kha, drum isch z Fuäss vu Chüblisch gä Schtralig uähär gloffä. I han scho än bitz komisch gluägät, wosch vormär gschtandä ischt: Höch und dick angleid isch gsin; än handglismätä Puli mid allärhand drundär, än lengä Schaal, wosch gwüss füüfmal um dä Hals gwicklät khan hed. Bin dä Hosä bin i miär nümmä sichär, abär äs wer khand mügli, dasch än Art Bündnärtuächhosä a khan hed. Bin ünsch lauft niämät mee äso umär, miär trägänd Gorätex und Fasärpelz.

Dass ischt äbä di Barbärä gsin, di eint vu dennä zwei komischä Vögäl vum frömdä Sendär. Welä hedsch äswas wüssä übr ds wild Männdli. I hann ärä denn zwei Büächär mitgän und schi ischt abgäzottlät. Undr ünsch gseid, mi heds gäduucht, schi si no än mögägi.

Ja, und denn heds kei Schnee mee khan.

Miär sind hindär äm Huus bim Znacht gsin, duä chund dr zweit vu dennä komischä Vögäl, dr Ruädi. Är hed denn au mid ünsch gschpislät, nu Sälat, will Fleisch ässäntsch nid. Was äär hed wellä und was är an kha hed weiss i nümmä, abär uusgsee hedr fascht wiä z wild Männdli, mid imschä Haarpracht ufäm ganzä Chopf und im Gsicht.

Ämal äs Tagsch hed dr Ruädi aaglütät, ob i nid chönnti äs Schtückli vum Düütschä in ünschä Diälekt übärsetzä. Das Schtückli hed schi denn as Schtuck usärgschtellt, und drzuä härä han i gmerkt, dass i zwüschät dürä im schriftlichä Uusdruck mid ünschär Schprach ä biz Müäh han.

Ufzmal heds gheissä, di Poolä chommänd. Derä siiänd bin ünsch scho mee gsin, heissts, im zweitä Wältchriäg. Drum heissts bin ünsch au an äs paar Ort Pooläschtuck. Zum Glück handläts schi da abär um äs andärs Poolaschtuck. Um viär polnäschi Chünschtlär, wo das Schtückli in minäm Diälekt ufnä hend wellä. Dsäb hendsch denn au, i bin äs Schtündli därbi gsin. Abär i sägän eu, i hann glachät…., dass hed gätöönt…., und drzuä härä hendsch denn au no wackär trichä mögä.

Ja und dr Guggär…, Beat heisstr vornä dürä. In dän hami fascht värliäbt. Nei nid direkt, abär in imschä Namä. Wenn där jetz no Hans heissti, Hans Gugg ind Luft, wers pärfekt, will, är hed d Idee khan ins Gras zliggä, zlosä und zguggä. Dass mä no än biz mee khöri as Heuschträffäl und andärs Gsümm hend drzuä härä füüf Prättigär Frauä Tegscht abgläsä.

Denn ischt z Vreni chon und hed di Bäraggä värchleidät. Diä leid hällgrüän Chischtä hedsch mit allärhand Schtoff narrä hübsch värziärt. Gschtrifflät, kariärlät und grüschälät. Äm Abät heds duä än Uuffüärig gän, im schtrömändä Rägä mid Schiiwärfärliächt. Buuchtanz und Tango ufäm Tach vur Bäraggä. Dz ganzä Bild vu däm Abät ischt gsin äswiä ufäm Mond, odär bessär gseid, äso richtig surrealistisch.

Denn is au scho widär chüälär gsin, wo zwei frömdi Vögäl chon sind. Vögäl im waarschtä Sinn vum Wort, müässt nu guät losä: D Chlarä und dr Valerian hend dinnä z Aschärinä bir Schrinärii vu Gaudi Egli äs Klaviär zärläid. Schi hend därzuä härä ufäm Klaviär gschpillt, sä lang dass gangä ischt und gsungä, äs narrä hübschs Liäd. Dzäb hendsch no lang, will äso äs Klaviär usänand nää geid äs Wiili. Drna hendsch d Ruckseck packt und sind obschi.
Dri Wuchä lang sindsch umär zogä, z Fuäss, hend übäral wosch än Vogälfädärä gfundä hend, äs Schtückli Klaviär zrugg glan und imä Hütti ghusät, wo no viil schlimmär gsin ischt, als di Bäraggä z Dälvazza. Wo i dass gschribä han, ischt mär äswas Zind chon, wa eigäntli nid da härä khört, abär Wundär hanni nottä wosch uf zHüsli sind? Uf all Fäll hendsch am Schluss alli Vogälfädärä uf äs Hääs gäbuätzt, wiä zwei Vögäl. Frömd hed mä nä na drii Wuchä nümmä sägä chönnä, mä hed schä übäral khennt.

Zu ünsch chon sindsch uf Iladig vu Peter Trachsel vur Hasena, genau wiä Ruädi und di Barbärä. Nu hed är schä irgänd äs wenn widr usgladä. Ärzelä tuän i eu dass nu, will dass äswiä no interessant ischt, will d Chlara und dr Valerian hend dr Ruädi und di Barbärä därna chennä glärnät.Da chönntämä sägä, dr Chreis hedschi gschlossä.

Duä sind di Bluät- und Läbärwürscht chon, dr Himmäl und d Höll, i meinä dr Fredi us Holland. Miär hend än Hock Lüüt igladä, vum Gmeindsarbeitär und Zimmärmaa bis zum Doktr und dr Värlegäri. Dr Fredi hed ünsch kochät, bim Ässä allärhand Interessants und Luschtigs ärzellt und nisch au no äs paar Gschenkli gmachät. No hüt hendsch in äs paar Hüschär Hampfläwiisch Muschgätnüss. Dass ischt abär nid dass gsi, wägä däm är bin ünsch gsin ischt. Chon ischtr wägä dä Schwämm und dä Vögäl, richtignä Vögäl, kein Frömdnä und keinä mid ufgäbüäztnä Fädärä.

Fascht hätt i dr Chruchischtäckä värgässä. Där hed mr nemmli Iindruck gmachät. Där Chruchischtäckä ischt nid än richtigä Chruchischtäckä gsin. Är hed usgsee wiä än Miniantennä wo dr Schpitz umgäbognä hed. Där Schtäckä odr bessär gseid diä Antennä hed dr Ruedi übärall därbi khan. Und wemmä grad ämal äswär passt hed, hed är mä dän ind Hand drückt und äs Fötäli gmachät. Ds ganz Jaar düür hed mä ufäm Intärnet gseh chönnä, wär da alläs gfötälät chon ischt. Da schtönd d Märiä Pitschi us Ascharinä näbät dm Boleslaw Czernak us Polä und d Fritzi Vugts us Holland näbät dm Amir Borenstein us Israel, Axslä an Axslä, Frömdi näbät Frömdnä, und nottä nööch.

Strahlegg, den 1. Mai 2005 Marietta Kobald-Walli

Lesung PRÄTTIGAUER HAIKU von Franz Dodel mit
Yuki Adam, Fredi Beckmans, Hartmut Abendschein und natürlich Marietta Kobald aus dem Prättigau

Fredie Beckmans aus Amsterdam (SENDUNG 10) performt Kulinarisches

REMIX: DJ pcb remixt live die SENDUNG 02

im Vordergrund:
FREMDER SENDER
CD-Edition, 15-teilig im Schuber
mit Booklet in Farbe, 24.S.
nummeriert und signiert

Präsentation der Sendungen

SENDUNG 12 : IT SUITS MY SOUL / Severin Hofmann läuft im Peugeot MULTI 205

...und über allem steht ein wunderbarer Sendeturm
aus den Werkstätten der RUWA Holzbau AG, Küblis!